KALIBO, Aklan–Nagapadayun pa ro imbestigasyon it barangay ag mga kapulisan sa natabo nga pagpamuno kahapon kadungan it selebrasyon it Paskwa sa Brgy. Tigayon, Kalibo.
Suno kay Punong Barangay Gil Morandante nga base sa buoe it CCTV footage makit-an ro pagsueod it biktima nga si Michael Tijano, 25-anyos ag Zion Von Aeron Diangson, 18-anyos sa baeay it suspek nga si Erwin John Eulogio, 18-anyos, parehong residente it nasambit nga lugar.
Base sigon sa pag-istorya it mga tawu nga idtu sa sueod it baeay nakipag-argumento si Tijano rason nga natabo ro pagpamuno.
Ro biktima hay nakaangkon it fatal nga lastro sa anang waea nga hawak nga gintunaan it anang hinali nga kamatayon.
Nadaea pa imaw sa ospital apang binawian man it hueam nga kabuhi.
Samtang, ro suspek hay presenteng nakakulong sa Kalibo Municipal Police Station para sa nagakaigo nga disposisyon.
Sa pihak nga parte, ginklaro man ni Kapitan Morandante nga ro may dating alitan hay ro mismong kaibahan it biktima nga si Diangson ag ro suspek.
Nauna eon sigon sanda nga gin-imbitahan sa barangay kaibahan ro andang natungdan nga pamilya ko mga nagtaliwan nga buean agud nga maistoryahan ro andang isyu.
Si Tijano hay sangka Sangguniang Kabataan (SK) kagawad it barangay ag nagaserbi bilang peacemaker sa mga nagakatabo nga kinagamo sa tunga it pamatan-on.
