KALIBO, Aklan — Nakipag-angot ro pamunuan it National Irrigation Administration ukon NIA – Aklan sa barangay council it Mantiguib, Makato agud nga maistoryahan ro reklamo it andang mga mangunguma angot sa gina-alegar nga owa nasusunod nga scheduling it patubi sa andang lugar.
Ginpaathag ni Anthonette Trinidad, senior water resources facilities technician it NIA Aklan nga ro nagadumaea sa schedule it patubi sa mga irigasyon hay ro gintukod nga irrigators association it kada barangay .
Aminado man imaw nga bangud sa manaba nga supply it patubi sa Aklan hay gin-abisuhan ro mga senior water resources facilities technician nga makaangkon it rotational nga distribution it irrigation water ukon alternate ro pag-supply it patubi sa mga irigasyon sa kada banwa.
Engkaso suno kana nga makaangkon it problema eabi eon sa isyu it water shortage, makipag-angot eamang sa natungdan nga presidente it asosasyon.
Ginpasiguro man it NIA nga may daily monitong sanda it scheduling it patubi .
Nasayuran nga nauna eon nga ginpaabot ni Punong Barangay Jose Rusia it Mantiguib, Makato sa Bombo Radyo ro kawad-an it supply it tubi sa andang kaeanasan rason nga nagkamaeatay ro andang binhi ag mga tanum nga paeay.
Raya hay bangud nga owa ginasunod ro schedule it patubi kada Biyernes ag Sabado.
