Kalibo Aklan ——Ninahan nga gindaea sa Aklan Provincial Hospital ro sangka eaeaki matapos nga ginbuno samtang nagabaktas sa kahabaon it tulay nga sakop it Brgy. Poblacion, Makato.
Nakaangkon it daywang ka mga lastro sa kaeawasan partikular sa anang likod ag anang tiyan ro biktimang si Darrio Depedro, 28-anyos, tumandok it Brgy. Dalipdip, Altavas apang presenteng naga-istar sa nasambitang lugar matapos nga ginbuno it ginatumod nga suspek nga si Romel Barrientos, 24-anyos ag residente it nasambitan nga lugar.
Base sa inisyal nga imbestigasyon , parehong una sa idaeum it makahieilong nga ilimnon ro magtimbang nga parte kat natabo ro insidente apang indi pa matumod ro motibo it suspek sa paghimo it krimen.
Samtang, boluntaryo man nga nagsurrender ro suspek sa mga otoridad ag sa makarun hay temporaryong nakakulong sa Makato Police Station para sa nagakaigo nga disposisyon.
