KALIBO, Aklan—Makipagbahin sa igapatigayon nga transport strike ro No to PUV phase out coalition sa probinsya it Iloilo kadungan sa State of the Nation Address ukon SONA ni Pangueong Ferdinand Marcos Jr. sa adlaw it Lunes, Hulyo 24.
Suno kay Mr. Elmer Forro, secretary general it Bagong Alyansang Makabayan ukon Bayan Panay nga tuyo kara nga ipakigsukoe ro kinamatarong it mga jeepney operators agud nga inde madueaan it pangabuhian angot sa ginaduso nga pag-implementar eon it PUV modernization sa maabot nga Disyembre 31.
Igapanawagan sigon it mga raya nga taw-an it importansya ro mga ginapangatubang nga problema it mga transport organizations.
Nauna eon nga ginpahayag it grupong Manibela nga kapin sa 200,000 nga public utility vehicles ro makipagbahin sa ginaplanong tatlong adlaw nga untat-byahe sa 9 nga rehiyon sa bilog nga nasyon kaeakip sa Metro Manila.
Raya hay para iprotesta ro kawad-an it urgency halin sa gobyerno para masolusyunan ro andang reklamo angot sa PUV modernization program.
