KALIBO, Aklan — Gin-abi-abi it Malay Tourism Office, agahon it Lunes, Pebrero 17, ro Norwegian cruise ship nga MV Norwegian Sky nga may sakay nga kapin sa 2,000 nga mga pasahero.
Nasayuran nga raya eon ro ika-ap-at nga beses nga nagbisita ro MV Norwegian Sky sa isla makaron nga dag-on.
Ro mga sakay kara hay ginaeakipan it Norwegian ag Asian passengers.
Bangud sa manami nga paniempo, haeos kaabuan sa mga pasahero hay nagpanaog sa cruise ship ag naglibot sa Boracay ag mainland Malay, ro ginakabig nga sambilog sa nagapanguna nga tourist destinations sa nasyon.
Ro nasambit nga cruise ship hay naghalin sa Puerto Princesa, Palawan antes nga nagpundo sa isla para sa sangka excursion.
Antes nga magsikaeum bandang alas-6:00 it gabi-i hay uman nga nag-eayag ro cruise ship paagto sa Manila.
Raya ro ikaywang cruise ship nga nagbisita makaron nga buean, ag ginaeauman nga may tatlo pa nga maga-abot antes nga matapos ro buean it Pebrero.
Ro Norwegian cruise ship hay ginabansagan nga cruise ship para sa mga rich and famous.
Madumduman nga nauna eon nga gin-anunsyo ni acting chief of the Port Cruise Ship Operation and Special Projects Niven Maquirang it provincial government it Aklan nga kapin sa 17 nga cruise ship ro ginaeauman nga magadungka sa Boracay antes nga matapos ro dag-on 2025.
Raya hay haeos doble sa nailistang siyam nga arrivals ko 2024.
