KALIBO, Aklan—Gusto it Regional Task Force to End Local Communist Armed Conflict nga makaangkon it hinun-anon sa provincial government agud nga istoryahan ro insurgency free status it probinsiya it Aklan.
Raya hay kasunod it panibag-ong engkwentru nga natabu sa tunga it mga katapo it 12th Infantry Batallion Philippine Army ag mga miyembro it CPP-NPA sa idaeum it SDG Igabon Platoon it Central Negros Front it Kilusang Rehiyon Panay kahapon it udtro adlaw sa Sitio Itabag, Brgy. Manika, Libacao, Aklan.
Suno kay NTF-ELCAC spokesperson for Legal Affairs Atty. Flosemer Chris Gonzales nga nagapatrolya ro militar sa lugar kat maka-engkwentro ro mga rebelde sa indi masayuran nga numero nga nagbuhay ro pagbaeayluhan it eupok sa sueod it 25 minutos antes nga umatras ro mga NPA.
Owa it naninahan sa parte it militar ag padayon nga ginatukib kun may naninahan ukon nangin casualty sa mga rebelde bangud sa mga nakita nga bakas it dugo.
Na-rekober it tropa it gobyerno sa gin-eontaran it engkwentro ro daywang M-16 armalite rifles, mga bala, magazine, cellphone, notebooks, ag nagkaeain-eain nga dokumento ag ap-at nga bandera it NPA.
Pinaagi sigon sa impormasyon it mga pumueuyu rason nga nadiskubrehan ro kampo it mga NPA nga may kapin sa 10 nga mga tolda.
Nasayuran nga raya eon ro ikaywa nga encounter nga natabu sa banwa nga ro una hay ko September 2022 kun sa siin nabungkag ro training camp it NPA sa Brgy. Dalagsaan.
May sangka NPA man sigon nga namatay sa Sitio Maytaraw, apang ro bangkay kara hay idtu ginpapanaog sa Calinog, Iloilo.
Aminado ro LGU-Libacao nga ginatutukan nanda ro Brgy. Manika ag Dalagsaan nga ginapugaran it mga rebelde.
Samtang, dugang pa ni Atty. Gonzales nga ko nagtaliwan nga dag-on pa sanda nagdangop sa provincial government agud nga kilaeahon nga may problema sa insurhensiya sa Aklan.
Angot kara, ginpasiguro it NTF-ELCAC nga nagapabilin nga eowas ro probinsiya sa atubang it uman nga pag-umwad it turismo partikular sa isla it Boracay.
