KALIBO, Aklan—Ginainsister it National Task Force to End Local Communist Armed Conflict (NTF-ELCAC) ro andang pagpamaeabag sa House Bill No. 77 ukon ro Human Rights Defenders’ Protection Bill nga ginaduso ni Albay Representative Edcel Lagman bangud nga raya sigon hay sangka mabahoe nga paeag sa demokrasya it nasyon.
Ginpaathag ni NTF-ELCAC spokesperson Atty. Cris Gonzales nga engkasong maipasa ro nasambit nga hagna hay magasalungat raya sa pilang mga naisalaye eon kaparehas it Anti-Terrorism Act, Anti-Money Laundering Law ag ro Terrorism Financing Prevention and Suppression Act.
Ginatumod sigon sa House Bill No. 77 nga ro “human rights defenders” hay ro sin-o mang indibidwal ukon asosasyon nga gustong proteksyonan ro kinamatarong it sangka tawo mapa local, national, regional ag international level man.
Ginatuyo dugang it proposisyong laye ro pagrespeto sa mga human rights defenders.
Ro ano mang pamaeag, pag label kaparehas it “communist” “terrorist” ukon “enemies of the state” sa mga human rights defenders hay ginapunggan it nasambit nga hagna.
Apang, ginpanindugan ni Atty. Gonzales nga ro ginaduso nga laye hay makabig nga pauman-uman ag inde eon kinahang-ean bangud sa mga presenteng nagaeksister nga laye rason nga hugot nanda raya nga ginapamaeabagan bangud nga uwa nagaayon sa presenteng sitwasyon ag sa mga ginapatuman nga laye sa nasyon.
