KALIBO, Aklan—Nagapabilin nga manaba ro numero it mga aplikasyon nga nababaton sa Register Anywhere Project it Commission on Elections ukon COMELEC-Kalibo.
Suno kay Municipal Comelec Officer Atty. Christian Itulid it Comelec Kalibo nga base sa andang pinaka-ulihi nga datos, naga-abot pa eamang sa kapin sa 300 ro nag-apply para sa voter registration pinaagi sa Register Anywhere Project nga ginsumite umpisa Pebrero 12 hasta Hunyo 30.
Bangud kara, plano nanda nga magpatigayon it satellite registration sa mga eskwelahan sa banwa it Kalibo ag sa City Mall agud nga mataw-an it kahigayunan ro publiko partikular ro mga estudyante nga makapahistro sa idaeum it Register Anywhere Project.
Ro ulihing pagparehistro sa idaeum it nasambit nga programa hay sa Agosto 30.
Sa pihak nga parte, naga-abot eon sa 2,000 hasta 2,500 ro numero it mga nagparehistro sa banwa it Kalibo para sa 2025 midterm elections.
Suno kay Atty. Itulid nga ro nasambit nga numero hay umpisa nga ginbuksan ro registration period.
Raya sigon hay nag-agi eon sa pag-apruba it Election Registration Board ukon ERB.
Ginpahayag dugang nga samtang nagahilapit ro pagtapos it registration sa Setyembre 30 hay nagatinaas man ro numero it mga nagapa-rehistro.
