Nagapati si Ombudsman Jesus Crispin “Boying” Remulla nga may kaangtanan sigon ro kampo ni dating House Speaker Martin Romualdez sa pag-atras it ap’at nga nagpakilaeang dating bodyguard ni dating kongresista Zaldy Co sa andang mga naunang salaysay.
Suno kay Remulla, indi maapektuhan it nasmabit nga recantation ro mga kasong ginpahaom kontra kay Romualdez angot it gina-alegar nga flood control kickback scheme.
Ginpamilit man nana nga boluntaryong ginpermaha it mga testigo ro andang mga affidavit ag may mga ebidensya ro andang taeataoan para pamatud-an raya.
Suno kana, ro mga umatras sa andang testimonya hay posible man nga maieakip bilang mga akusado sa kaso.
Samtang, mahugot nga ginpamalibaran ni Romualdez ro alegasyon ag ginhambae nga uwa imaw it kaangtanan sa pag-atras it mga testigo.
Ginpamilit man nana nga ro recantation hay nagapamatuod sigon nga uwa it basehan ro mga akusasyong ginaeapog kontra kana ag haom imaw nga atubangon ro mga kaso gamit ro ebidensya ag legal nga proseso.
