KALIBO, Aklan — Imbes sa nakasayan nga buean it Oktubre, pormal eon nga gintaeana ni Kalibo Mayor Juris Sucro sa Nobyembre 3, 2026 ro Opening Salvo it Kalibo Sr. Sto. Niño Ati-Atihan Festival 2027 kadungan sa Kalibo Foundation Day.
Suno kay Jay-Ar Arante, head it media affairs it LGU-Kalibo nga raya hay matapos ro unanimous nga pag-endorso it komite sa sangka pueong sa munisipyo nga ginsuportahan man ni SB Member Rex Bautista.
Tiempo man suno kana nga ro Kalibo Foundation Day ukon ro pagdumdum sa anibersaryo sa pagkatukod it Kalibo ko 1571 hay special working holiday sa bilog nga banwa sa idaeum it Republic Act No. 12102.
Kadungan kara, nagpaguwa si Mayor Sucro it Executive Order para sa pagbilog it mga working committee nga magabulig sa pagplano ag pagpahaum sa Ati-Atihan Festival nga pagahiwaton umpisa sa Enero 7 hasta 17 bilang pagtau it pasidungog kay Señor Sto. Niño de Kalibo.
Tuyo sigon ni Mayor Sucro nga makaangkon it temprano nga preparasyon agud nga maprotektahan ro tradisyon ag kasaysayan it Ati-Atihan, kamana man nga mas pa nga mapabaskog ro turismo, kultura ag ekonomiya it Kalibo.
Ro festival hay pagapangunahan sa gihapon it Kalibo Ati-Atihan Festival Board (KAFEB) sa idaeum it Ordinance No. 2022-0003.
