KALIBO, Aklan — Nagapati si Atty. Harry Sucgang, sangka political analyst sa probinsiya it Aklan nga nagapabilin nga dehado ro oposisyon sa maabot nga eleksyon maskin pa nga nagdeklara si Aklan 2nd district congressman Ted Haresco nga magapadaeagan imaw nga owa it grupo.
Suno kay Atty. Sucgang nga tagilid ro oposisyon bangud nga owa sanda it ginbutang nga magapadaeagan nga gobernador nga maka-engkwentru ni incumbent Governor Joen Miraflores.
Imposible suno kana nga mag-gastos it mabahoe makaron si Haresco agud nga i-suporta sa oposisyon eabi eon sa mga magapa-ilihir it alkalde sa kada banwa nga kaeabanan nga ginadumaeahan it gobernador .
Sa pagdihon it kandidatura ni dating Governor Joeben Miraflores bilang kongresista sa ikaywang distrito, namapatud-an sigon nga may bagina gid man sanda it anang igkampod nga si Haresco .
Posible sigon nga nakaangkon it owa pagka-ilintindihan ro daywa bangud sa pagtukod it oposisyon kun sa siin gina-alegar nga pilit nana nga ginabutangan it kontra ro mga kandidato it Tibyog Akean.
Matsa naaywan sigon sa tabtaban ro oposisyon nga nagsalig kay Haresco bangud sa kakueangan it pondo ag makinarya.
