KALIBO, Aklan—Kapin sa P120,000 ro tanyag nga pabuya sa makaturo sa suspek nga si Mark Archie Torrefiel, 31 anyos it Brgy. Cajilo, Makato nga imaw ro ginaturo nga responsable sa makangiedlis nga kamatayon ni Bonna Hercia Ambay, 24-anyos, reliever branch manager it RD Pawnshop, Mabini St. Kalibo branch ag residente it Brgy. Nauring, Pandan, Antique.
Base sa ginpaguwa nga mensahe ni Charmagne Candari Nojas, igkampod it biktima nga anang pamilya hay nagtanyag it nasambit nga kantidad para sa mas madali nga pagkadakop sa suspek nga ginapatihan nga nagpaeagyo paadto it Metro Manila bangud nga idto ro anang ginikanan.
Nag-apela man raya sa anang mga kakilaea ag kaabyanan nga kon may impormasyon angot sa suspek hay insigidang makipag-angot sa Kalibo police station bangud nga sigidas ro ginapatigayon nga hot pursuit operation it mga otoridad.
Nauna eon nga nagtanyag it kapin sa P30,000 nga pabuya si Kalibo mayor elect Juris Bautista kamana man ginaeauman nga pati si Aklan second district representative Teodorico Haresco hay magatanyag man it pabuya sa makaturo sa suspek nga si Torrefiel.
