POLICE Report — Nag-abot sa P2 milyong balor it shabu ro nabo-oe sa sangka babaye ag daywang eaeaki nga kaibahan kara matapos mag-viral ro post kara sa online social media sa paghithit it shabu.
Sa ginpatigayon nga operasyon it mga operatiba it Iloilo Provincial Police Office-Provincial Drug Enforcement Unit (IPPO-PDEU), nadakpan ro suspek nga kilaea sa pangaeang Apple, taga-Estancia, Iloilo.
Nabo-oe sa suspek ro 290 gramo it ginadudahan nga shabu nga naga-abot sa balor nga P2 milyon.
Suno sa kapulisan, ginpaidaeum nanda sa limang bueang monitoring ro suspek bangud man sa reklamo it mga residente nga eapnaag ro pagbaligya it shabu sa andang lugar.
Nakabaton man it intelligence reports ro kapulisan nga si Apple ro nagapangunang distributor it shabu sa northern Iloilo ag pilang parte it probinsya it Capiz.
Nagapati man ro mga awtoridad nga ro suplay it shabu it suspek hay naghalin sa Iloilo City ag Metro Manila.
Madumduman nga nag-viral sa social media ro gin-post ni Apple ro aktong paghithit kara it shabu.
Nakataeanang pasakaan it nagakaigo nga kaso si Apple ag daywang eaeaking kaibahan kara.
