KALIBO, Aklan—Imposible pang maobra nga P20 per kilo ro bugas sa nasyon.
Raya ro naging panan-awan ni Aklan provincial agriculturists Salome David.
Suno kana nga kon pagasumahon hay medyu malabo nga mataw-an it katumanan ro naging campaign promise ni presumptive president Ferdinand Bong Bong Marcos.
Matabu eamang sigon raya kon owa nagtaas ro production cost it mga mangunguma partikular ro abono ag bayad sa laborer.
Dugang pa nga kon uman nga iga-subsidize it gobyerno ro pagpamakae it bugas it National Food Authority ukon NFA, apang ginduea eon raya makaron kanda tuga it rice tarrification law, sa baylo hay buffer stocking eon lang ro andang trabaho.
Sa pihak nga parte, ginkalipay man it nasambit nga taeatapan ro owa pagbarat it mga traders sa ginabaligya nga paeay it mga farmers.
Raya hay nagakahueugan nga naging epektibo suno kana ro intervention it provincial government sa marketing support.
Mag-eowas kara, naging competitive eon man suno kana ro bugas it Aklan kun sa siin raya ro kaabuan nga ginabaligya makaron sa Kalibo public market.
Nakabulig sigon it mabahoe ro gintukod nga Aklan grains center sa pag angkon it manami nga kalidad it bugas sa probinsiya.
Nagahampang makaron sa P19 ro presyo it uga nga paeay ag P15.50 ro eabtong nga naka-pattern sa presyuhanay it NFA.
