Aprubado eon sa ikatlo ag ulihing pagbasa sa sangguniang panalalawigan ro ordinansa angot sa pag-institutionalize it mental health sa probinsya it Aklan.
Ginpahayag ni Aklan first district board member Bayani “Jojo” Cordova, tuyo kara nga maamligan ro mental health it mga Aklanon ag makapatindog it mental health facility nga magasapopo sa mga indibidwal nga may deperensya sa paino-ino.
Plano it gobyerno probinsyal nga mapatindugan it nasambit nga pasilidad ro mga kabanwahanan apang makaron hay ap-at ka banwa eang anay ro anang ginapunterya nga mabutangan.
Madumduman nga una raya nga ginduso sa 18th sangguniang panlalawigan pinaagi sa committee on health chairperson nga si dating board member Nelson Santamaria apang uwa naaprubahan eagi ag napaiway bangud sa nagkaeain-eain nga rason.
Uman raya nga ginbuhi sa makaron nga set of sangguniang panlalawigan officials pinaagi man kay board member Bayani Cordova nga insigida man nga ginsuportahan ni Aklan governor Joen Miraflores.
Nasayuran nga may naga-eksister nga national ordinance para sa mental health kon siin obligado man ro gobyerno probinsyal nga i-adopt raya.
