KALIBO, Aklan – Suportado it lokal nga gobyerno ko banwa it Malay ro anumang tikang it Inter-Agency Task Force sa uman nga pagbukas ko isla it Boracay sa Oktubre 26.
Raya hay kasunod ko abisu it Department of Tourism nga daeayon eon nga igabawae ro ginadagsang LaBoracay, pinakamabahoe nga beach party sa isla.
Nagapati si Executive Assistant for Boracay Affairs Rowen Aguirre it LGU-Malay nga makapamayad para sa isla ro pag-promote kara bilang environment-friendly, kon siin igabawae man ro pagpanigarilyo ag pag-inom it aeak sa beachfront.
Masaming nagabuhos ro masobra sa 60,000 hasta 70,000 nga mga turista kada LaBoracay sa sueod it tatlong adlaw nga uwa it untat nga party.
Nasayuran nga limitado eon ro puwedeng magsueod nga turista sa isla kasunod ro pagtaeana it carrying capacity it Department of Environment and Natural Resources (DENR).
