KALIBO, Aklan — Nakataeana eon nga pagahimayon it legal division it Commission on Human Rights ukon CHR-region 6 ro kaso it pagkamatay it 12 anyos nga si Kent Richie Nadal it Brgy. Calangcang, Makato, masobra sang dag-on eon ro nagtaliwan.
Raya ro ginkumpirma sa Bombo Radyo ni Jobert Peregrino, special investigator 1 it CHR region 6.
Suno kana nga nakasumite eon ro Department of Health ukon DOH-Aklan it written investigation report angot sa natabu ko Agosto 13, 2019.
Samtang, owa eon sigon ginpaburan it CHR central office ro hinyu it pamilya Nadal nga ipaidaeum sa autopsy ro bangkay it andang unga agud nga masayuran ro matuod-tuod nga ginkamatay kara bangud nga makabig eon nga inconclusive ro resulta bangud nga na-embalsamo eon ro anang bangkay.
Nasayuran nga nagdangop sa Bombo Radyo si Mr. Ritchel Nadal, ama it biktimang si Ken-Ken agud nga mataw-an sigon it hustisya ro pagkamatay it anang unga.
Hasta sa makaron hay mabaskog sigon ro andang pagduda nga namatay ro anang unga matapos maturukan it measles-rubella ag tetanus-diphtheria nga ginpangunahan it mga taga-Rural Health Unit (RHU) nga ginpatigayon sa sueod it Makato Integrated School bilang kaparte it school-based immunization program.
Gin-eagnat sigon ro anang unga pagka-gabi-i rason nga gindaea sa Provincial Hospital nga ko ulihi hay gin-refer sa sangka cardiologists sa Iloilo City bangud sa pag-angkon it palpitations ukon madasig ag irregular nga pitik it tagipusuon.
Namatay ro unga sa ospital ko Agosto 19 tuga it cardiogenic shock ag myocarditis.
Ginpamalibaran man nana nga may ginpirmahan sanda nga parents consent agud nga himuon ro pagbakuna sa unga.
Ro deworming eamang sigon ro andang ginpasugtan.
