Ginkalipay ni Pangueong Ferdinand R. Marcos Jr. ro pagkilaea it World Bank sa Pilipinas bilang sangka upper-middle-income country (UMIC).
Suno sa Pangueo, raya hay sangka pamatuod nga naging epektibo ro mga programang pang-ekonomiya it gobyerno sa nagtaliwan nga ap-at nga dag-on.
Nauna eon nga ginpahayag it World Bank nga nag-abot sa USD 4,850 ro gross national income (GNI) per capita it Pilipinas, nga mas mataas sa ginakinahangean nga USD 4,636 para maeakip sa mga upper-middle-income country.
Suno kay Pangueong Marcos, matapos ro haeos ap-at nga dekada bilang lower-middle-income country, ginapakita it bag-ong estado ngara it Pilipinas nga nagabaskog ro ekonomiya it nasyon sa pihak it mga hangkat sa bilog nga kalibutan.
Bangud kara, kumpyansa ro Pangueo nga mas magataas ro kumpiyansa it mga investors sa Pilipinas, nga magadaea it mas maabung negosyo, trabaho, ag oportunidad para sa mga Pilipino.
Sa atubang kara, ginpamilit it Pangueo nga ro pag-umwad it ekonomiya hay dapat mabatyagan it kada pamilya pinaagi sa mas mayad nga pagpangabuhi ag mas maabung oportunidad sa kabuhi.
Nagpromisa man imaw nga pagapadayunon it gobyerno ro pagtrabaho hasta nga maeksperyensiyahan it tanan nga Pilipino ro mga benepisyo it pag-umwad it nasyon.
Suno man sa Department of Economy, Planning, and Development (DEPDev), naangkon it Pilipinas ro bag-ong lebel bangud sa dere-deretso nga pag-umwad it ekonomiya, maayos nga pagdumaea ag pangmabuhayan nga reporma.
Ginaeauman man it DEPDev nga mas magabaskog ro kumpiyansa it mga investors, maga-abu ro dekalidad nga pag-invest ag magahimo it mas maabu nga manami nga trabaho.
Ginkilaea man it ahensya ro mabahoe nga amot it mga overseas Filipino workers (OFWs) sa ekonomiya it nasyon.
Sa pihak kara, ginpahayag it DEPDev nga nagapabilin ro pilang hangkat rason nga padayun nga pagatinguhaan it gobyerno nga masiguro nga ro pag-umwad hay mabatyagan ag mapuslan it tanan nga Pilipino.
