KALIBO, Aklan—Gin-aprubahan eon it House Committee on Suffrage and Electoral Reforms ro proposisyong pagpaiway it Barangay ag Sangguniang Kabataan Elections nga nakataeana kunta sa Disyembre 5 it presenteng dag-on.
Sa boto nga 12-2 hay nakaeusot ro proposisyon ag napili it komite bilang bag-ong petsa para sa nasambit nga elections ro unang Lunes it December 2023.
Nagdesisyon man ro komite nga ro mga magadaog sa nasambit nga eleksyon hay maga-umpisa ro termino sa Enero 1, 2024 para sa period it tatlong dag-on.
May kaangtanan kara, para kay Punong Brgy. Neil Candelario it Poblacion, Kalibo hay paborable raya nga tikang para kanda bangud nga madugangan ro dag-on sa pagserbisyo sa andang mga constituents.
Mapadayon ro mga programa ag proyekto nga naumpisahan sa barangay.
Mag-eowas kara, kon may eleksyon hay inde gid mawaea nga makabatyag it gaoy sa pagpangampanya sa anda nga mga nasakupan.
