KALIBO, Aklan—Ginbaliwala ag uwa ginkilaea it mga mangingisda ro pagpamaeag it gobyerno it China nga pagadakpon it China Coast Guard ro sin-o man nga dumueoong nga magasueod sa ginaagawan nga teritoryo sa West Philippine Sea.
Suno kay Leonardo Cuaresma, presidente it New Masinloc Fisherman’s Association nga may kaugalingon sandang laye nga ginasunod bangud nga ro West Philippine Sea hay nakasueod sa Exclusive Economic Zone it Pilipinas rason nga may kinamatarong sanda nga magsueod sa kaeawran nga ginapanag-iyahan it nasyon.
Nagapadayon sanda sa pagpaeaot ag uwa it kahadlok nga nagasueod sa Bajo de Masinloc bangud nga pagpangisda ro andang pangita nga ginabuhi sa andang tagsa ka pamilya.
Ginpahayag dugang ni Cuaresma nga sa kaeapad it eawod hay inde tanan mabantayan it China Coast Guard rason nga ginabaskog it mga raya ro andang buot ag haom sanda nga makipagsukoe bangud nga ro dagat eamang ro andang ginaboe-an it pangabuhian.
Ginpanindugan pa ni Cuaresma nga uwa sanda it ginaeabag nga laye maskin nga amat-amat eon nga nagakalagas ro mga nagapangisda sa lugar bangud sa kalugihan daea it permi nga pagtabog it China Coast Guard.
Sa kamatuoran suno kana hay nagakasamad ro mga lamang dagat sa nasambit nga bahura bangud sa kahimuan it China Coast Guard.
