KALIBO, Aklan—Ginmandu ni Numancia mayor Jesserel Templonuevo ro mas hugut nga pagpatuman it curfew sa mga pamatan-on sa nasambit nga banwa sandig sa naga-eksister nga ordinance no. 6 series of 2005.
Sa ginpaguwa nga executive order, pormal nga ginpatuman ko Marso 20, 2024 ro “curfew hour” sa tanan nga mga menor-de-edad sa banwa it Numancia.
Base sa ginpaguwa nga EO No. 13 series of 2024, ro mga pamatan-on nga naga-edad it 17 panaba hay pagabawaean nga magwinarang sa karsada umpisa alas-10:00 it gabi-i hasta alas-4:00 it aga-aga.
Bukon it kaibahan ukon exempted sa curfew ro mga pamatan-on nga naga eskwela ukon nagatrabaho sa gabi-i; may kaibahan nga ginikanan; nagabakae it bueong ukon nagasunod sa mandu it mas magueang kana ukon emergency.
Ro sin-o man nga magaeabag kara hay may nagakaigo nga penalidad nga ginaeakipan it multa nga hasta sa 200 pesos sa mga ginikanan ag community service it sang oras hasta waeong oras sa mga menor de edad.
Samtang sa mga operator ag tag ana it motor vehicle nga ginasakyan it mga menor de edad ag establisimento nga ginapasugtan sanda sa sueod maskin nga eampas eon sa curfew hour hay may multa nga 500 hasta 1,000 pesos.
Nagapati ro mga opisyal it banwa nga makabulig ro curfew sa pagpabaskog it kampanya kontra sa ilegal nga droga ag iba pang klase it kriminalidad.
