NATIONAL News —- May posibilidad nga uman nga sumabog ro Bulkang Taal maskin nga owa it nailistang volcanic earthquakes sa palibot kara umpisa ko domingo.
Suno kay DOST Undersecretary ag Phivolcs director Renato Solidum Jr., ro gulping pagnaba it sulfur dioxide emission ko domingo sa 1,140 tons hay posibleng resulta nga nakaangkon it abang sa main crater.
Mataeupangdan man sigon ro gulping pagnaba it sulfur dioxide gas ukon masobra sa 1,000 tons eon lang ag posibleng nakaangkon it pagbara sa aeagyan it gas rason nga may ginatawag nga pressurization.
Ginpaathag pa ni Solidum nga maskin nga owa it mga pag-uyog hay padayun ro pagsaka sa baba it bulkan ro mainit nga volcanic fluid nga nagatuga it asu nga may kataason nga 1,000 meters.
Owa man it time window kun hin-uno igapapanaog ro alert level ag engkaso nga makakita ro Phivolcs it parametro nga posibleng makaangkon it mas mabaskog nga pagsabog, posible sigon nga ipataas eagi sa level 4.
Presenteng sa Alert level 3 ro Taal Volcano matapos ro pagsabog ko Sabado.
