KALIBO, Aklan — Nagpanindugan si Aklan 1st district congressman Carlito Marquez nga kinahangean nga mag-agi sa tamang proseso ro pagtukod it Caticlan-Boracay bridge.
Suno kana nga sandig sa master plan it San Miguel Holdings Corporation, proponent it proyekto nga pagagamiton ro nasambit nga tulay para sa madali nga pag-transport it andang mga turista nga gustong magwarang sa Boracay.
Base sa plano it nasambit nga kompaniya, kasunod it pagdevelop sa Godofredo P. Ramos Airport sa Caticlan nga makasunod sa international standard hay igasunod ro pagpatindog it hotel nga may 5,000 rooms, convention center nga may 25,000 seating capacity ag sangka parke nga kapareho it Sentosa Park it Singapore nga magiging dugang nga atraksyon sa mga turista .
Raya sigon hay igapatindog tanan maeapit sa airport sa Nabas to Caticlan nga area .
Kaibahan man sa plano ro pagbutang it monorail sa isla ag cable car.
Bangud nga posibleng makaapekto ro Caticlan-Boracay bridge sa income ag development it LGU-Malay ag provincial government, ginpahayag ni Cong. Marquez nga dapat nga mag-agi raya sa nagakaigo nga konsultasyon ag approval.
Ginklaru man nana nga kat gin-presentar ro proyekto sa manabang kapueungan it Kongreso hay owa it sin-o man ro nag-oponer kara.
Sa pihak nga parte, makabulig man sigon ro proyekto agud nga ma-decongest ro Boracay kun sa siin ro mga empleyado hay pagabutangan it staff house sa mainland Malay kamana man nga madasig nga mahakot ro mga basura adlaw adlaw paagto sa sanitary landfill sa mainland.
