BALITANG Espesyal — Ro Power Nap Contest it South Korea ro ginakabig nga pinakamasadya ag pinaka-relaxing nga contest sa bilog nga kalibutan.
Sa baylo nga magaoy ag hueasan, ro kinahangean eamang nga obrahon sa kompetisyon hay ro matueog!
Kan-o eamang, kapin sa 100 South Koreans ro nag-agto sa Han River Park sa Seoul agud nga magpasakop sa Power Nap Contest.
Suksok ro andang mga eambong nga pangtueog, kanya-kayang usoy it kumportableng pwesto ro mga contestants agud nga matueog it hamuok sa sueod it sang oras ag 30 minutos.
Suno sa organizer it Power Nap competition nga si Lim Ji-Hyeon, ro South Korea ro may pinakamanabang sleep duration sa mga nasyon nga miyembro it Organization for Economic Cooperation and Development (OECD).
Base sa datos, nagakatueog eamang ro sangka South Korean it 7 oras ag 41 minutos kada gabi-e, mas manaba kumpara sa OECD average nga 8 oras ag 22 minutos.
Pinaagi sa pagpatigayon it Power Nap Contest, nagaeaum ro organizers nga makapahuway ro mga contestants ag mabatyagan ro mga benepisyo it pagtueog.
Bukon it maeumo ro nasambit nga kompetisyon bangud nga samtang nagakatueog hay paga-istorbuhon ro mga contestants pinaagi s pag-itik, paghutik ag iba pa.
Matumod ro nagdaog pinaagi sa pag-check sa heart rate it mga contestants bangud nga kon mas mabahoe ro kinaiba it pitik it tagipusuon antes ag samtang nagakatueog, mas maayos ro naging pahuway.
Tuyo sigon it contest nga ipaabot sa tanan nga maskin ano pa ka-busy, importante sa gihapon nga masiguro nga may una nga bastante nga tueog ag pahuway.
Ro pagtueog hay importante sa pang adlaw adlaw nga hilimuon nga nagatau it kabaskog ag energy agud nga atubangon ro mga hangkat sa kabuhi.
