Ikaywa ro mga trabahanteng Pilipino sa listahan it mga pinaka-masinadyahong empleyado sa Asia-Pacific, suno sa pinakabag-ong Workplace Happiness Index: Philippines 2025 it Jobstreet by SEEK.
Base sa pagtuon nga ginpatigayon umpisa Oktubre hasta Nobyembre 2025, nagpasakop ro masobra sa 10,500 empleyado sa bilog nga rehiyon, kaibahan ro 1,000 Filipino workers nga may edad 18 hasta 64.
Nagguwa sa resulta nga 77% it mga Pilipinong respondent ro naghambae nga “somewhat or extremely happy” sanda sa trabaho, nga nagapangaywa sa Indonesia nga may 82%.
Base sa report, ro mataas nga lebel it kasadyahan sa trabaho hay tuga it mas madaeum nga pagtan-aw it mga empleyado sa kahueugan it andang trabaho, personal wellbeing, ag career development, mag-eowas sa sweldo ag flexibility.
Sa regional breakdown, pinakamataas ro happiness rate sa Visayas nga may 82%, kasunod ro National Capital Region nga 77%, samtang 76% man sa Luzon ag Mindanao.
Maskin nga may sangkiri nga kina-iba, ginpahayag sa pagtuon nga haeos pareho ro lebel it workplace happiness sa bilog nga nasyon.
Base pa sa report, 77% it mga respondent ro nakabatyag it pagiging “valued” sa andang trabaho, samtang 74% ro naghambae nga fulfilling ro andang mga trabaho.
Maskin nga nagapabilin nga nagapanguna nga concern ro sweldo sa pagbo-oe ag pagpabilin it empleyado, mas nagatuhaw makaron ro importansiya it “sense of purpose” ag kontribusyon it trabaho sa personal ag organisasyonal nga katuyuan.
Samtang, nagguwa man sa pagtuon nga may epekto gihapon ro stress ag burnout sa mga trabahador, kun sa siin 41% ro naghambae nga kontrolado nanda ro andang stress level, samtang 38% ro naka-eksperyensiya it grabeng pagka-gaoy sa trabaho.
Nailista man ro pagkabaeaka it mga empleyado sa artificial intelligence (AI), kun sa siin 41% ro naghambae nga may pagkabaeaka sanda sa posibleng epekto kara sa andang trabaho.
Suno kay Dannah Majarocon, Managing Director it Jobstreet by SEEK sa Pilipinas, tuyo it pagtuon nga buligan ro mga employer nga makabilog it mas epektibong workplace nga nagasakdag sa engagement ag long-term growth it mga empleyado.
