KALIBO, Aklan—Mag-angkon it kumpyansa nga ipadayon ro mga bagay nga abi mo hay inde masarangan nga obrahon ag permi nga magsalig sa kaugalingon kamana man himuon nga inspirasyon ro suporta it pamilya, kaabyanan ag mga tawo nga nakapalibot kimu.
Raya ro gin-aywanan nga pamisaea it sangka daeaga sa interview it Bombo Radyo Kalibo matapos nga ginkoronahan bilang Miss Enchanting Balete 2023.
Si Ms. Alyssa Joy Justo it Brgy. Calizo, Balete ro nagpangibabaw kontra sa iba pang kandidata sa pageant nga ginpatigayon sa nasambit nga banwa bilang kaparte it andang kapyestahan.
Mag-eowas sa korona nga nasuksok sa daeaga, nakuhit man nana ro third place bilang best advocacy showcase kon sa siin nagasentro sa mental health ro anang adbokasiya.
Si Ms. Justo hay nagapasakop man sa modeling ag maging sa pageant sa andang eskwelahan.
Samtang sa pihak nga parte, medyo uwa gihapon ga sink-in sa pamilya Justo ro kadaeag-an ag kadungganan nga nakuhit it andang onga.
Suno kay Mrs. Sally Justo, eubus gid ro andang kalipay bangud nga unexpected ro pagdaog it anang onga matapos nga pangaywang beses pa eamang raya nga pageant nga anang ginpasakupan.
Sa bulig it pangamuyo ag suporta it bilog nga pamilya hay nakuhit ni Ms. Alyssa ro korona.
Samtang, si Mrs. Justo hay dati eon man nga nagapasakop sa mga pageant ag namana it anang onga.
