KALIBO, Aklan—Nagapati ro pamilya Custodio nga tuga it pagka-irita rason nga natueop it 32-anyos nga kristo sa bueangan ro sangka babaye nga kaparehong kristo matapos nga nagpanukot it utang sa sueod it Numancia cockpit arena.
Suno sa misis it suspek nga ginsaysay kana it anang mister nga si Charlie Custodio alyas Baldo nga haeos haruan eon imaw it biktimang si Rebecca Marquez tuga it sobrang kahilungon.
Pilit sigon nga ginasukot it biktima ro suspek it utang kara nga P1,000 pesos.
Gina-alegar nga nag-utang si Custodio it nasambit nga kantidad sa mister ni Marquez ag bangud nga kinahangean eon nana ro kwarta hay ginsukot nana raya.
Sa kaakig it suspek nga una man sa impluwensiya it aeak hay ginbayo nana ro biktima nga nag angkon it lastro sa anang kilay ag gaob sa mata.
Sa makaron hay desidido ro biktima nga pasakaan it kaso ro suspek.
Sa pihak nga parte, ginpahayag ni kagawad Edna Apolinario it Barangay Laguinbanuea East, Numancia nga medyu masangag gid man si Marquez eabi eon kon hilong.
Owa sigon raya it permanenteng trabaho ag naga-raket eamang bilang kristo sa bueangan kon may kahigayunan.
Ro anang mister sigon it biktima hay sangka tricycle driver.
Gindugang pa it kagawad nga pagasuportahan nanda ro igapasaka nga kaso ni Marquez kon mapamatud-an nga una imaw sa tama.
Sa pihak nga parte, pilang residente sa lugar ro nagpaabot it reklamo sa Bombo Radyo angot sa ginapatigayon nga online sabong sa nasambit nga bueangan.
