KALIBO, Aklan–Hustisya ro panawagan makaron it pamilya it sangka ama nga napatay matapos nga barilon it andang kaeapitbaeay bandang alas-10:15 kabi-i sa Brgy. Biga-a, Malinao.
Suno kay Dominga Gregorio, asawa it biktimang si Jimmy Gregorio, 58-anyos, sangka laborer ag residente it nasambit nga lugar nga bukon it makatarungan ro pagkamatay it anang mister matapos nga barilon it kaeapitbaeay nga si Ronnie Naig, alyas Goding.
Kabay suno kana nga magsurender eon sa mga otoridad ro suspek agud nga sabton ro anang saea nga nahimo.
Indi sigon nana eubus maisip kon ham-an nga natubsan gid it suspek ro anang mister sa manabaw nga dahilan.
Nasayuran nga ro daywa hay nag-inuman sa cottage it suspek, apang kat mahilong eon hay nakaangkon it mainitan nga diskusyon nga nagresulta sa pag-alsa it boses it biktima.
Ginsueang sigon it 17 anyos nga unga nga si John Lester Domingo ro anang ama , apang ginsundan sanda it suspek ag ginbaril.
Ro biktima hay nag angkon it igo it bala sa anang kilid halin sa indi pa matumod nga kalibre it armas samtang ro anang binatilyo nga unga hay tinamaan man sa anang tuo nga alima.
Patay eon kat maka-abot sa aklan provincial hospital si Gregorio samtang padayun makaron nga naka-confine ro anang unga.
Ro insidente hay padayun nga gina-imbestigahan it Malinao Municipal Police Station.
