Eubus nga ginkalipay ko pamilya it aklanon athlete nga si Mary Francine Padios, 18-anyos ag residente it Brgy. Old Buswang, Kalibo ro anang pagkakuhit sa unang bueawan nga medalya para sa Pilipinas sa hampang nga Pencak Silat sa 31st Southeast Asian Games nga ginapatigayon sa Hanoi, Vietnam.
Suno sa anang ina nga si Doneza Padios, ginbuhos it daeaga ro anang pinaka-best sa hampang sa bulig man it anang coach ag trainor.
Haeos adlaw-adlaw hay puspusan ro andang training para mapasanyog pa gid ro andang performance kon siin nagbunga it bueawan nga medalya ro andang hugod sa pag-ensayo.
Ginpahayag dugang ni Mrs. Padios nga nakasuporta eamang sandang mag-asawa kaibahan ro bilog nga pamilya kay Francine sa patag it hampang nga napilian.
Madumduman nga si Padios hay ginbueos kay 2018 Asian Games bronze medal winner Cherry May Regalado nga nakaangkon it knee injury antes ro 2019 SEA Games.
Nagpaidaeum sa training ro bilog nga koponan sa Nueva Ecija para sa sangka bubble training bilang pagpahaum sa Vietnam SEA Games.
Kabilugan nga 18 atleta nga ginaeakipan it 13 nga eaeaki ag 5 babaye ro sumabak sa nasambit nga biennial event sa pagpanguna nanday 2019 SEAG gold medalist Edmar Tacuel (men’s tunggal) ag silver medal winners Alfau Jan ag Almohaidib Abad (tunggal/ganda event).
Nagbalik man sa koponan si 2017 SEAG gold medalist Dines Dumaan
