KALIBO, Aklan — Indi makapati sa natabu pamilya it sambilog sa Aklanon seafarers nga napaeakip sa limang Pinoy nga missing matapos nga nasunog ro Taiwanese fishing vessel sa Falkland Islands nga andang ginasakyan ku Pebrero 11, 2019.
Madumduman nga kaeakip sa gindeklarang missing sanday Virgilio “Jhon” Regencia Jr., 21-anyos ag igkampod kara nga si Justine Anipan, 20-anyos, parehong residente it Barangay Gibon, Nabas.
Kaibahan ro daywang Aklanon sa limang Pinoy nga missing sa 69 crew members it nasambitan nga barko.
Sa interview it Bombo Radyo Kalibo kay Maria Gloria Regencia, manghud ni Jhon Regencia, indi sigon nanda mabaton ro makatindog baeahibo nga pagkamatay it anang magueang.
Raya hay kasunod it mga nakita nanda nga litrato ku mga bangkay it mga biktima kung siin ginkumpirma kara nga ro sambilog hay anang magueang.
Suno kay Maria Gloria nga kung ginrescue sigon eagi ro mga biktima hay posible nga nasalbar pa ro mga raya.
Apang, agod nga masiguro gid ro mga bangkay it biktima, igapaidaeom pa sigon ro mga raya sa DNA test.
Sa pihak nga parte, eubos man ro pagkasubo it ama ni Virgilio “Jhon” Regencia sa natabo sa anang unga. Ginpahayag ni Virgilio Regencia Sr. nga mabuot ro anang unga ag owa raya it bisan sin-o nga naging kaaway sa andang lugar.
Hasta sigon sa makaron hay indi na mabaton ro natabo sa anang unga.
Dugang pa kara, owa pa sanda it ideya kung hin-uno mai-uli sa nasyon ro bangkay it daywa ka mga biktima.
