KALIBO, Aklan — Nagakasubo makaron ro pamilya ni Mark Vincent Navarrete, 31, ag residente it Brgy. Poblacion, Libacao nga sambilog sa pitong namatay sa pagkueob it dragon boat sa Brgy. Manocmanoc sa isla it Boracay.
Ayon kay Mrs. Marissa Naverrete, ina ni Mark Vincent nga ginakabig nga bread winner it andang pamilya ro anang unga, kun sa siin, sa kamatuoran hay owa pa raya naka-asawa bangud nga ginapa-eskwela pa ro anang mga manghud.
Ginapangamuyo eon lang sigon nanda makaron ro kalinong it kaeag it anang unga bangud nga baton eon man nanda ro natabu nga trahedya sa dagat nga naging rason it anang hinali nga kamatayon.
Nagpanawagan man si Mrs. Navarrete sa pamunuan it Dragon Force team ag nagkaeain-eain nga ahensiya it gobyerno nga buligan sanda sa pinansiyal nga kinahangeanon, kun sa siin, bangud nga medyu may kabahoe ro eawas ag mataas ro anang unga hay nagakinahangean sanda it mabahoe nga kantidad para sa anang kabaong.
Nasayuran nga naga-training ro 21 nga miyembro it grupo para kunta sa pagapasakupan nga international competition sa buean it Nobyembre sa Taiwan kat gulping ginhampak it mabahoe nga humbak rason it pagkueob it ginasakyan nga baroto.
