KALIBO, Aklan —- Indi makapati ro pamunuan it Office of the Provincial Agriculturist sa naging resulta it pagtuon nga ginpatigayon it Bureau of Soil Management it Department of Agriculture nga owa nagakabagay ro eugta nga gintau sa mga katutubong Ati sa isla it Boracay nga tamnan it mga produktong pang agrikultura sa idaeum it Certificate Of Land Ownership award ukon CLOA.
Suno kay Engr. Alexis Apolonio it OPA nga kaibahan imaw sa nag-inspection sa lugar ag nagtau it technical assistance sa mga katutubo rason nga owa imaw nagapabor sa pahayag nga ro nasambit nga mga eugta hay bukon it suitable para sa agricultural purposes.
Maskin sigon nga medyu mabaeas ag mabato ro lugar, apang owa nagakahueugan nga indi raya matamnan it mga pananum.
Ro nasambit nga study ro naging basehan it mga protesta sa Department of Agrarian Reform ukon DAR Region 6 agud nga kanselahon ro mga CLOAs.
Madumduman nga sa ap-at nga magkaseparado, apang magkaparehong resolutions nga ginpaguwa umpisa ko Marso, gin-grant it DAR Western Visayas ro protesta sa gindihon nga petisyon it mga property developers sa kapin sa 4,800 square meters it eugta nga gin award sa kapin sa 15 nga ati tribal families bilang land reform beneficiaries sa Barangay Manoc-Manoc.
