KALIBO, Aklan—Ginpaabot it sangka political analyst nga nagakadapat nga taw-an it nagakaigo nga pagrespeto si Pangueong Ferdinand Marcos Jr., bangud nga imaw ro pinakamataas nga opisyal it nasyon .
Raya ro ginpahayag ni Atty. Harry Sucgang , dating provincial board member ag political analyst sa aklan matapos nga paueanan it mga mahaeang-haeang nga mga tinaga it anang dating ka-tandem nga si Vice President Sara Duterte ro presidente sa ginpatigayon nga press briefing ko October 18.
Kaibahan sa mga banat ni VP Sara hay indi maka-intiguhan si Marcos nga obrahon ro anang trabaho bilang presidente rason nga una eon sa “road to hell” makaron ro Pilipinas.
Ginpakigbahin man ni Duterte nga ginpaandaman nana si Senator Imee Marcos sa andang group chat nga kon indi mag-pundo ro kampo it mga Marcos sa pag-atake kana, pagakutkuton nana ro eubnganan it andang ama nga si dating presidente Ferdinand Marcos Sr. sa Libingan ng mga Bayani ag ihaboy sa West Philippine Sea .
Nagaguwa sigon makaron nga matsa owa it kinaiba ro batasan it bise presidente sa anang amang si dating pangueong Rodrigo Duterte.
Posible suno kana nga na-adopt nanda ro andang pamalakad sa Davao City kun sa siin ginakahadlukan ro andang pamilya .
Nagpaandam man si Atty. Sucgang nga posibleng magahinay-hinay ro pamilya Duterte sa oras nga pasugtan it gobyerno ro pagsueod it mga international criminal court ukon ICC investigators agud nga usisaon ro angot sa war on drugs it nagtaliwan nga administrasyon .
