KALIBO, Aklan—Padayun ro pagbulig it Pastrana St. Kalibo community pantry matapos nga owa sanda nagpundo sa pagpatigayon kara sa tunga it naexperiensiyahan nga pandemya nga tuga it covid 19.
Suno kay Ramon Quimpo, Jr. sambilog sa mga coordinator it nasambit nga community pantry nga tuyo kara nga mabuligan ro mga maisot nga residente ag pamilya nga owa it maboe-an it andang mga kinahangeanon eabi pa ag nagatinaas makaron ro presyo it mga baeak-eon ag serbisyo.
Gindugang pa kara nga ro andang grupo hay sangka non-government organization ukon NGO kun sa siin kinahangean nanda nga buligan ro gobyerno.
Samtang, bukas sigon ro andang grupo sa pagbaton it donasyon.
Sa Community Pantry, pwedeng magbo-oe ro sin-o man it bastante eang sa andang kinahangeanon ag pwede man nga magtau it sandig sa andang masarangan.
Ginapakita sigon it Community Pantry ro pagbuylog it mga residente sa atubang it naexperiensiyahan nga krisis kamana man ro disiplina sa pagbo-oe it bastante eang agud nga makasamit man ro iba.
