Magatangis eon man ro mga consumer sa panibag-ong pagtaas sa presyo it mga baeak-eon.
Magasaka ro presyo it pilang basic goods base man sa ginpaguwa nga bag-ong suggested retail price (SRP) guide it Department of Trade and Industry (DTI).
Kaibahan kara ro presyo it mga de-lata, tinapay, gatas, kape, noodles pati sabon, baterya, kandila ag iba pa.
Ginpaathag it pamunuan it DTI, gin-una nanda ro mga manufacturer nga nagkaproblema halin sa andang pagkalugi ukon nagsarado bangud sa epekto it pandemya.
Sa pihak it pagtaas, pilang manufacturer ro nagpahayag nga maga-hirit pa sanda it umento bangud nga bukon pa sigon it bastante ro ginpataas sa SRP.
Angot kara, gina hirit it mga trabahador ro P100 pesos nga umento sa tunga it mataas nga presyo it mga baeak-eon.
Gin engganyo ro Kongreso nga mag-baeay it special legislation nga maga-garantiya sa partas nga pagtaas sa sweldo para sa tanan nga mga rehiyon sa nasyon.
Nasayuran nga ro balor it minimum wage sa Metro Manila hay nagnaba it P88 pesos bangud sa pagtaas it presyo it commodities.
Ro pangutana, masarangan baea it mga employer, eabi eon it mga maintok nga negosyo ro panawagang pagtaas sa suweldo?
Basi ro matabu hay magabawas it tawo sa baylo nga magadugang it sweldo.
Ro tanan hay apektado it mga pagtaas sa presyo it mga nagapangunang baeak-eon.
Kon maghueag ro sambilog , siguradong magahueag man ro iba.
Kapareho eon lang sa presyo it petrolyo nga sa kada nagataas hay may nagakatabu nga domino effect.
Rason nga dugangan ro pasensya ag pag-intindi sa sitwasyon.
Mas ayuson pa ro pag budget .
Kabay nga mas ayuson man it gobyerno ro pagtrabaho.
Tun-an it mayad kun paalin nga makadungan sa inflation.
Pirmeng dumdumon nga minilyon nga mga Pinoy ro nagsalig sa administrasyon ngara.
Kabay nga indi sanda mapas-eawan ag magno-oe .
