Ginsiguro it Malacañang nga nagahimo it tikang si Pangueong Ferdinand Marcos Jr. para pataason ro sweldo it mga trabahador, partikular sa private sector. Raya hay kasunod it panawagan it pilang mamalidha ag labor groups nga ubrahong urgent ro Wage Hike Bill.
Suno kay Palace Press Officer Usec. Claire Castro, gusto it pangueo nga magpatigayon it konsultasyon sa mga stakeholders para mausisa ro tamang tikang para sa pagtaas it sahod, samtang ginasiguro man ro kapasidad it mga employers nga mapatuman raya.
Ginpadumduman man it Malacañang nga anumang kasuguan it Pangueo angot sa wage hike hay insigida nandang ipatuman.
Nagapabilin mang bukas si Pangueong Marcos nga makipagdayalogo sa mga labor groups para talakayon ro mga proposisyong makamayad sa kapakanan it mga tabahador. Ginpamilit man nanang uwa gina-balewala it gobyerno ro andang hinyo, apang kinahangean pang planuhon raya it maayos.
