KALIBO, Aklan—Naka-monitor eon ro Provincial Disaster Risk Reduction and Management Council ukon PDRRMC – Aklan sa atubang it ginaeauman nga pagsueod it severe tropical storm nga si Odette sa Philippine Area of Responsibility ukon PAR hinduna nga gabi-i .
Suno kay PDRRMC action man Galo Ibardolasa nga sa oras sigon nga makasueod raya sa PAR hay iga-categorized raya nga typhoon.
Nagapatigayon eon sanda it mga pagpahaum ag koordinasyon sa andang regional ag mga municipal disaster risk reduction and management councils agud nga masiguro ro kaeowasan it publiko.
Ginpahayag dugang nga haum eon man ro mga foods packs it Provincial Social Welfare and Development Office kamana man ro mga bueong ag medical personnel it provincial health office engkaso nga makaangkon it mga evacuees.
Ginlaygayan eon man sigon it Philippine coast guard ro mga mangingisda nga indi eon mag-eayag agud nga makalikaw sa disgrasya.
Samtang, kasado eon man ro preparasyon it PNP ag AFP para sa andang search, rescue and retrieval operation kamana man ro bureau of fire protection sa deployment it andang special rescue force.
Naka-standby man ro mga tawuhan it kalibo international airport engkaso nga magakinahangean it logistical needs ro probinsiya.
Ginpasiguro man nga may bastante nga pondo para sa mga igapatigayon nga pagresponde.
Samtang, gindugang ni ibardolasa nga activated eon man ro andang emergency operation center sa andang opisina umpisa hin-aga nga adlaw kun sa siin 24/7 ro andang operasyon.
Mag-eowas kara, natigayon eon man nga ma-imbentaryo ro andang mga rescue ag clearing equipment.
Angot kara, ginlaygayan ni Ibardolasa ro publiko eabi eon ro mga residente nga magpabilin nga alerto sa pinaka-ulihing weather advisories, ag magsunod sa mga otoridad engkaso nga kinahangean nga magpatuman it evacuation.
