KALIBO, Aklan — Ginkumpirma ni Bombo International Correspondent Arnel Noel Gellada it Texas, USA nga nag-umpisa eon ro tempranong pagboto ukon early voting sa nagkaeain-eain nga estado it Amerika pilang adlaw antes ro eleksyon sa Nobyembre 5.
Suno kana nga pwedeng makaboto ro mga botante idtu it personal ukon pinaagi sa mail ukon koreo.
Ro pilang mga estado hay nagapaguwa it detalye angot sa early voting nga ginaeakipan it partidong ginasuportahan, edad it mga botante, ag pamaagi it pagboto.
Samtang, aktibong gina engganyo sigon it kampo ni Vice president Kamala Harris ro mga botanteng Democrats nga panipuslan ro early voting, sangka estratehiya para makatipon it mga boto antes ro mismong adlaw it eleksyon.
Maskin nga kritikal si dating President Donald Trump angot sa early voting, gina duso man kara sa anang kampanya sa mga Republicans nga magboto it temprano.
Sa makaron hay naga abot eon sa kain sa 62 milyon ro nakaboto pinaagi sa mail ag early voting sa bilog nga nasyon.
Sa pihak nga parte, ginpahayag ni Gellada nga pinaagi sa pinaka-ulihing survey, nagapanguna si Kamala it masyado kaisot nga margin nga masobra sa sang porsiyento eamang ag raya hay pinaagi sa popular vote, apang padayun nga ginabantayan ro pitong swing states nga may mabahoe nge epekto sa resulta it eleksyon kun sa siin raya ro mga estado nga owa it ginasuportahan nga partido.
