NEWS Analysis– Kasunod it pahayag it Department of Tourism (DOT) nga paga-imbestigahan ro “Love the Philippines” campaign video, nagpaguwa eon it pahayag ro ahensyang nag-obra kara.
Nagpangayo it pasaylo ro DDB Philippines para sa suno kanda hay “unfortunate oversight” angot sa pag-ililiba it non-original stock footage sa audiovisual presentation.
Kadungan kara, ro pag ako sa bilog nga responsibilidad.
Nauna eon nga nag-viral online ro mga post nga palpak ro video sa bag-ong kampanya it DOT.
Base sa post it sangka blogger, ro tourism video nga ginpaguwa hay naggamit it pilang stock video clips halin sa Storyblocks, sangka subscription-based stock footage website, nga owa ginboe-an sa Pilipinas.
Indi sigon maganaba sa limang eksena ro ginboe-an sa ibang nasyon kapareho it rice terraces nga sa Bali, Indonesia; mangingisdang nagahaboy it lambat sa Thailand; sangka pampasaherong eroplano nga nagapaeapit sa runway sa Zurich, Switzerland; naga-eumpat nga mga dolphin , owa natumod nga lokasyon apang bukon sa Pilipinas; ag tawong naga-drive sa sand dunes sa Dubai, United Arab Emirates.
Nauna eon nga ginhambae it pamunuan it DOT nga gumastos it P49 milyon pesos sa “Love the Philippines” campaign ag slogan.
Bagay nga umani man it nagkaeain-eain nga reaksyon nga siguradong mas pang maga init bangud sa isyu gihapon it campaign video.
Sa pihak it pagpangayo it pasaylo it DDB, dapat gihapon nga magpatigayon it imbestigasyon agud nga masayuran kon ham-an raya natabu ag agud nga indi eon mauman pa.
Sa kamatuoran, maabu nga mga manami nga lugar sa Pilipinas nga puwedeng ibida sa bilog nga kalibutan nga indi naton kinahangean nga mag angkon sa ibang nasyon.
