SPORTS News — Nakahimo it kasaysayan ro nasyon sa French capital matapos naabot it Team Philippines ro best-ever medal haul umpisa nga magpasakop sa Olympic Games, may 100 anyos eon ro nagtaliwan.
Pagadaehon pauli it nasyon halin sa 2024 Paris Olympics ro daywang ka gold medal halin sa gymnast nga si Carlos Yulo ag tig-sangka bronze medal halin sa Filipina boxers nga sanday Nesthy Petecio ag Aira Villegas.
Raya eon ro magamarka sa pinakamayad nga output it Pilipinas sa Olympiyada.
Nagpangibabaw si Yulo sa men’s floor exercise ag vault ag nangin pinakauna nga eaeaki nga Filipino athlete nga nakabo-oe it gold ag pinakauna nga Filipino gymnast nga nakadaog it anuman nga medalya.
Imaw man ro pinakauna nga Filipino Olympian nga nakadaog it daywang gold medal.
Sa pihak nga ginkueabos si Petecio nga matupungan ro anang silver medal output sa Tokyo Olympics, naghimo man imaw it history matapos nga nakabo-oe it bronze sa women’s 57kg event ag nangin two-time Olympic medalist, kaibahan sanday Yulo, Hidilyn Diaz ag Teofilo Yldefonso.
Ro daywang ka gold ag daywang bronze nga nabo-oe sa Paris hay nag-eampas sa medal haul halin sa Tokyo nga sangka gold, daywang silver ag sangka bronze.
Sa makaron ro Pilipinas hay may kabilugan eon nga 18 nga medalya nga may tatlong gold, limang silver ag 10 nga bronze.
Nangin best performing nation man ro Pilipinas sa bilog nga Southeast Asia sa edisyon it Tokyo ag Paris Olympics.
