KALIBO, Aklan—Nagapadayon ro intelligence surveillance ag monitoring it Provincial Intelligence Service (PIS) sa mga ginapahayag nga illegal gambling kaparehas sa mga tupada ukon bueo-bueo nga makabig nga illegal nga sugae.
Suno kay PIS acting Chief P/Capt. Willan Aguirre, sigidas ro operasyon makaron it mga otoridad agud nga matapna eon ro nagakalhit nga illegal gambling sa tunga it ginapangatubang nga pandemya.
Ginpaathag nga ginagamit makaron it mga sugaroe ro social media kaparehas it pagkriar it group chat kon sa siin idto sanda nagatransaction para eamang matigayon ro andang illegal nga aktibidad.
Nasayuran nga hugot sa makaron nga ginabawaean ro mass gatherings maskin nga una sa idaeom it modified general community quarantine ro bilog nga probinsya it Aklan rason nga ginaekspektar nanda nga magahimo ro mga raya it ibang pamaagi para eamang madayon ag masunod ro andang bisyo.
Apang, aminado si P/Capt. Aguirre nga limitado sa makaron ro andang resources rason nga ro tanan nga pamaagi hay anda nga ginahimo para eamang masakote ro mga nagapatigayon it illegal gambling.
Sa pihak kara, nagpadumdom man sa publiko si P/Capt. Aguirre nga imbes magpatigayon it illegal nga sugae hay magkooperar eon lang sa mga otoridad ag sa gobyerno agud nga matapna eon ro pandemya sa komunidad.
