KALIBO, Aklan—Ginabatikos ag ginapamaeabagan it mga mangingisda sa probinsiya it Aklan ro planong pag-import it nasyon it nagkaeain-eain nga klase it mga maintok nga isda.
Ginkwestiyon ni Agustin Besin, sangka mangingisda ro nasambit nga plano bangud nga owa pa man sigon ginakueang it supply it isda ro Pilipinas.
Gin-insister pa nga masarangan nanda nga suplayan it isda ro mga pampublikong merkado sa nasyon para sa kinahang-eanon it mga pumueuyu.
Ginpahayag dugang nga ro nasyon hay naga angkon it maeapad nga kaeawran rason nga owa nagakabagay ro importasyon.
Ro nasambit nga plano sigon hay maka apekto sa andang pangabuhian nga magiging rason it pagnaba it andang kita.
Sa pihak nga parte, aminado sanda nga medyu naulihi eon ro makinarya it mga mangingisda sa pilipinas kumpara sa ibang mga nasyon, apang masarangan nanda nga magtau it bastanteng supply.
