Hugot ro padumdom it pulisya nga eabag sa laye ag posibleng makasuhan ro sin-o man nga magahana nga magpatigayon it bomb threat sa oras nga madakpan it awtoridad.
Raya hay kasunod it series of bomb threats nga natabo sa mga pampubliko, unibersidad ag pribadong eskwelahan sa bilog nga probinsya it Aklan.
Suno kay P/Maj. Leopoldo Booc Jr., assistant chief it Regional Anti-Cybercrime Unit ukon RACU-6, maid-id ro andang ginahimo nga imbestigasyon agud nga matumod kon sin-o ro sa likod it mga numero nga nagpadaea it bomb threat nga nagtuga it perwisyo sa mga estudyante, manugturo ag personnel it mga eskwelahan.
Suno kana, bukon eamang it klase ro naistorbo kundi maging ro trabaho ag nagtao raya it kabaeaka ag kahadlok sa tanan bangud nga bukon it hangae ro bomb threat.
May mga ginahimo eon sigon sandang tikang agud nga makilaea ro mga iresponsableng indibidwal ag inde sanda mag-untat hasta sa inde ro mga raya makasuhan.
Dugang pa ni P/Maj. Booc nga maskin nagdelete it account ro mga suspek hay ma-trace gihapon ro andang identity maskin nga naggamit pa sanda it dummy account bangud sa mga digital footprint ag data nga andang ginakolekta.
