Nagkaistorya sa telepono sanday Pope Leo XIV ag Israel President Isaac Herzog agud talakayon ag matapos eon ro nagapadayon nga giyera sa Middle East, agahon it Biyernes, Abril 3.
Ginkumpirma raya sa sangka statement nga ginpaguwa it Holy See Press Office, kon sa siin gin-insister it Santo Papa kay President Herzog ro kinahang-eanon nga buksan it uman ro tanan nga posibleng linya it diplomatikong diyalogo agud mapundo eon ro malala nga kinagamo.
Tuyo it nasambit nga pag-istorya it lider it Simbahang Katolika ag Israel nga makausoy it pamaagi para sa sangka malig-on ag pangmabuhayang kalinungan sa rehiyon, kapin eon sa konteksto it nagapadayon nga gyera.
Nagtapos ro nasambit nga pag-istorya sa pag-insister it Santo Papa sa importantasya it pagprotekta sa mga sibilyan ag pagrespeto sa international humanitarian law.
Ro nasambit nga tawag sa tunga it Santo Papa ag Presidente it Israel hay sa tunga it pagdumdom it Easter ag Jewish Passover, kon sa siin nagbaeayluhan man sanda it pagbati.
Si Pope Leo XIV, nga nagpahayag it grabeng pagkabaeaka sa nagataas nga kinagamo hay padayon nga nagapanawagan sa mga pinuno it kalibutan nga pilion ro negosasyon kaysa sa armas.
