KALIBO, Aklan—Nagakabaeaka makaron ro mga residente ag opisyal it Brgy. Linabuan Sur, Banga matapos nga mahugos ro porsyon it revetment wall sa Aklan river nga sakop it andang barangay.
Suno kay Punong barangay Enriquez Belarmino it nasambit nga lugar, una imaw nga nakabaton it report ko gabi-i it Huwebes matapos nga naguba ro sangkiri nga parte it sangka span it estaka.
Apang, owa sigon nanda ginaeauman nga eubusan eon nga mag-collapse ko Biyernes ro kabilugan it sangka span it revetment wall nga kaparte it phase 1 nga proyekto it Department of Public Works and Highways (DPWH)-Aklan.
Nasayuran nga masobra sang dag-on pa eamang ro nagtaliwan halin kat mahuman ro proyekto rason nga ginkakibot nanda ro hitabo.
Posible sigon nga bangud sa sigidas nga pagbubu it uean ag pilang pagbaha ro rason it paghina it pundasyon it estaka.
Ro nasambit nga revetment wall hay konektado hasta it Brgy. Jumarap.
Ginabuebanta nga naga-abot sa 30 meters ro nahugos nga porsyon it revetment wall.
Suno kay Kapitan Belarmino nga inisgida imaw nga nagpatigayun it pueong kung siin gindesisyon it bilog nga council nga magpadaea it sueat sa opisina it DPWH-Aklan kaeakip ro pilang mga litrato para maipaabot ro andang problema.
Sa makaron hay ginahueat eon lang nanda ro magiging aksyon it taeatapan.
