KALIBO, Aklan—Uman nga nagpanawagan ro Philippine Red Cross ukon PRC-Aklan chapter para sa mga blood donor sa atubang it pagnaba it supply it dugo sa blood bank tuga it Coronavirus pandemic.
Suno kay Mary Joe Galleon, OIC it PRC-Aklan nga bangud sa paeag it COVID-19, owa it masyadong naga-agto sa andang taeatapan agud nga mag-donate it dugo ag owa man masyadong nakapatigayon it mga blood letting activity bangud sa community quarantine.
Apang makaron nga ginbutang eon sa modified general community quaranrtine ukon MGCQ ro probinsiya it aklan hay amat amat eon man nga ginapatigayon ro voluntary blood donation activity.
Nasayuran nga imbes sa Hulyo 31 hay ginpaisoe sa Agosto 7 ro blood letting activity it LGU-Ibajay sa pakikipagbueuligan it PRC ag Bombo Radyo Kalibo.
Nauna eon nga ginpasiguro it LGU-Ibajay nga ro nasambit nga aktibidad hay ginplanuhan it mayad agud nga owa it maeabag nga patakaran partikular ro pagpatuman it health protocols kapareho it pag-disinfect ag physical distancing.
Hugut man sigon nanda nga bantayan ro crowd control ag pagalimitahan ro tawo sa venue bangud nga bawae pa ro mass gathering ukon pagtumpok tumpok it tawo.
Ro Bombo Radyo Kalibo hay magatau it souvenir dugong Bombo t-shirt sa sin-o man nga successful blood donor.
Mag-eowas sa LGU-Ibajay, ginpahayag ni galleon nga maabu pa nga mga LGUs, barangay council, pribadong sector ag iba pang grupo ro nagpahayag it interes nga magapatigayon it bloodletting.
Samtang, ginlaygay man kara sa first timer nga blood donor nga maging tampad sa pagsabat sa interview.
May questionnaire sigon nga pagasabtan ro mga magatau it dugo ag iga examine man ro mabo-oe nga dugo agud nga masigurong eowas raya agud nga itau sa ibang tawo.
