KALIBO, Aklan—Presente eon nga gina-istoryahan it lokal nga gobyerno it Kalibo ro mga pamaagi kon paalin nga irescue ro mga nagakalhit eon man nga “badjao” nga nagapakalimos sa karsada sa banwa it Kalibo.
Suno kay punong barangay Neil Candelario it Poblacion, Kalibo nga ro nasambit nga problema hay natigayon eon nanda nga matalakay kaibahan ro Municipal Social Welfare and Development Office ag Kalibo PNP.
Ginpahayag ni Candelario nga may laye angot sa pagbawae sa pagpakalimos ag kinahangean nga ipatuman.
Ginasugid nga ko opening salvo hay uman nga nakita ro presensiya it mga badjao nga gina-alegar nga nagbiyahe sakay it daywang ka pumpboat ag nagdungka sa baybayon nga sakop it bakhaw.
May kahigayunan man nga ginhakot ro mga raya it truck ag indi masayuran kon siin naghalin ro mga raya.
Kaeabanan nga kada naga-abot ro “ber months” hay makita ro presensiya it mga raya.
Sa andang pag-monitor, nakikita ro mga badjao nga naga-eubog sa guwa it mga establisimento komersiyal nga may pandong ag sa Oyo Torong area.
Ginatukib pa sigon nanda kon may nagabuyot ukon handler ro mga raya.
Madumduman nga ko nagtaliwan nga mga dinag-on hay gin-rescue man ro mga badjao ag ginpa-uli sa andang natungdan nga lugar.
Kaibahan sa andang plano hay ro pag-profiling sa mga raya agud nga matumod ro andang identity ag ro andang ginhalinan.
Ginpaathag ni Candelario nga pila sa mga nagapakalimos nga badjao hay may bitbit nga mga unga ag ginareklamo nga nagadisturbo sa mga “riding public”.
