KALIBO, Aklan—Sa pagsueod it buean it Agosto, grabe ro naging pagtaas it presyo it bugas sa mga merkado publiko.
Suno kay Jocelyn Adoc, negosyante it bugas sa Kalibo public market nga bangud sa kakueangan it supply kara sa nasyon rason nga nagsirit ro anang presyo.
Bangud sa bukon it bastante nga ani sa Aklan, kaeabanan sa andang supply hay nagahalin sa Manila, Mindoro ag Vietnam.
Sa makaron ro pinakamanaba nga presyo it bugas hay 46 pesos ag ro pinakamahae hay 55 pesos nga eubus nga naka apekto sa mga consumers.
Haeos uniform man sigon ro andang presyo sa tindahan.
Ginpaathag pa kara nga eauman ro pagtaas it presyo sa merkado sa kada ginakapos ro supply sa mga baealigyaan.
Owa suno kana sanda it mahimo bangud nga mataas man ro andang bo-oe sa andang supplier.
Madasig sigon nga nagakaubos ro andang supply bangud nga haeos tanan hay nagadaeawat bangud sa kawad-an it naka stock nga paeay sa mga kabaeayan.
Samtang, panawagan it negosyante sa gobyerno partikular sa Department of Agriculture nga maghimo it mga tikang agud nga madugangan ro supply it bugas agud nga mapahagan-hagan ro presyo kara sa merkado.
