KALIBO, Aklan—Padayun ro pagtinguha it mga otoridad sa probinsiya it Aklan agud nga matapna ro pagkalhit pa it makamaeatay nga African swine fever (ASF).
Raya hay matapos nga sa 17 nga banwa hay tatlo eon lang ro owa it nailistang kaso.
Suno kay Provincial Veterinarian Dr. Mabel C. Siñel ro numero it baboy nga andang ginpaidaeum sa culling hay naga abot eon sa 4,064 agud nga indi eon matapnan ro iba pang baboy.
Base pa sa andang record, kabilugan nga 39,507 nga baboy ro nagkaeamatay ag gin-eubong matapos nga dapuan it sakit halin sa 85 nga barangay sa bilog nga probinsiya.
Ro mga hog raises nga nakapa-insured sa Philippine Crop Insurance Corporation ukon PCIC it andang mga alagang baboy hay may mabaton nga financial assistance.
Kapin sa 248 man nga blood sample it alagang baboy nga boluntaryong ginsumite ro nagpositibo sa ASF ag 1,187 nga household ro nag-report nga sanda hay namatayan it alaga ag sanda ro boluntaryo nga nag-eubong.
Samtang, umpisa ko enero hasta hunyo nga inventory, may una pa nga 72,692 nga baboy ro nabilin sa probinsiya, apang nagapati ro OPVET nga posibleng ro iba kara hay ginkatay eon.
Nasayuran nga ro mga banwa it Libacao, Madalag ag Buruanga eon lang ro ginakabig nga ASF free, apang ginasugid nga may napabalita man nga pilang baboy ro nagkaeamatay sa indi masayuran nga dahilan.
Sa pihak nga parte, ginkumpirma ni Dr. Siñel nga nagapadayun hasta makaron ro andang distribusyon it cash aid sa mga hog raisers nga naapektuhan it ASF.
Sa masobra sa P7 milyon pesos nga gintaeana nga pondo it provincial government, kapin sa 3.9 milyon ro na-release ag may nabilin pa nga kapin sa P3.5 milyon pesos.
Padumdum nana nga sa tanan nga mga nagpa-cull it andang baboy nga hasta eon lang sa Agosto 31 ro andang deadline sa pagsumite it mga requirements para sa pag release it cash assistance.
