Nakibuylog ro Presidential Task Force on Media Security (PTFOMS) sa bilog nga media community sa pagpangasubo sa pagkamatay ni Juan “Johnny” Dayang, 89-anyos matapos nga ginbaril-patay sa sueod mismo it anang panimaeay sa Villa Salvacion, Barangay Andagao, Kalibo, Aklan ko Abril 29, 2025.
Nagbyahe paadto it Kalibo si Undersecretary Joe Torres it PTFOMS ag personal nga nag-adto sa baeay ni Dayang agud sayuron ro brutal nga pagpatay sa batikang mamamahayag nga ginakabig nga haligi it Aklan Press Club.
Suno kay Torres, naireport eon sa Palasyo it Malacañang ro insidente kon sa siin, strikto sigon ro bilin ni Pangueong Ferdinand Marcos Jr. nga maid-id nga imbestigahan ag tutukan ro mga makaraya nga insidente bangud nga bukon eamang it raya ro una nga may napatay nga miyembro it media.
Nakipag-angot eon sigon sanda sa Special Investigation Task Group (SITG) agud masayuran ro mga tikang it pulisya sa ginapatigayon nga imbestigasyon.
Nakabantay sigon ro PTFOMS sa mga nagakatabo ag handom nanda nga maiserbe it temprano ro hustisya sa naging kamatayon it Chairman Emeritus it Publishers Association of the Philippines (PAPI).
Angot kara, ginpadumdom ni Torres ro tanan nga miyembro it media nga mag doble-dahan bangud sa puro kamatuoran eamang ro ginapahayag mapa-print ukon broadcast media.
